رباعيات صلاح جاهين

بمناسبة ذكرى رحيل صلاح جاهين اقدم لكم بعضا من رباعياته

[size=29]رباعيات صلاح جاهين[/size]

خرج ابن آدم من العدم قلت: ياه
رجع ابن آدم للعدم قلت: ياه
تراب بيحيا.. وحي بيصير تراب
الأصل هو الموت والا الحياه ؟
عجبي !!!

ضريح رخام فيه السعيد اندفن
وحفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!

ياما صادفت صحاب وما صاحبتهمش
و كاسات خمور و شراب وما شربتهمش
أندم علي الفرص اللي انا سبتهم
و الا علي الفرص اللي ما سبتهمش
عجبي !!

و الكون ده كيف موجود من غير حدود
و فيه عقارب ليه وتعابين ودود
عالم مجرب فات وقال سلامات
ده ياما فيه سؤالات من غير ردود
عجبي !!!

أنا شاب لكن عمري ألف عام
وحيد لكن بين ضلوعي زحام
خايف ولكن خوفي مني أنا
أخرس ولكن قلبي مليان كلام
عجبي !!!!

يا باب يا مقفول إمتي الدخول
صبرت ياما واللي يصبر ينول
دقيت سنين.. والرد يرجع لي: مين ؟
لو كنت عارف مين أنا كنت أقول
عجبي !!!

أحب أعيش ولو في الغابات
أصحي كما ولدتني أمي وابات
طائر.. حيوان.. حشرة.. بشر ..بس أعيش
محلا الحياة حتي في هيئة نبات
عجبي !!

كان فيه زمان سحليه طول فرسخين
كهفين عيونها وخشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي !!

عجبتني كلمة من كلام الورق
النور شرق من بين حروفها وبرق
حبيت أشيلها ف قلبي.. قالت حرام
ده أنا كل قلب دخلت فيه اتحرق
عجبي !!!

رقبه قزازة وقلبي فيها انحشر
شربت كاس واتنين وخامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبي !!!!

ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!

ورا كل شباك ألف عين مفتوحين
وانا وانتي ماشيين يا غرامي الحزين
لو التصقنا نموت بضربة حجر
ولو افترقنا نموت متحسرين
عجبي !!!

نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان والدنيا غرقانه شر
عجبي !!

علي رجلي دم .. نظرت له ما احتملت
علي إيدي دم.. سألت ليه ؟ لم وصلت
علي كتفي دم.. و حتي علي رأسي دم
أنا كلي دم .. قتلت ؟ ..... والا اتقتلت
عجبي !!

انا كل يوم أسمع ... فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!!

ينبوع و في الحواديت أنا سمعت عنه
إنه عجيب .. وف وسط لهاليب لكنه
شقيت كما الفرسان طريقي .. لقيت
حتي الخنازير والكلاب شربوا منه
عجبي !!!!

يا قرص شمس ما لهش قبة سما
يا ورد من غير أرض شب ونما
يا أي معني جميل سمعنا عليه
الخلق ليه عايشين حياه مؤلمة
عجبي !!!

شاف الطبيب جرحي وصف له الأمل
وعطاني منه مقام يا دوب ما اندمل
مجروح جديد يا طبيب وجرحي لهيب
ودواك فرغ مني .... و إيه العمل
عجبي !!!

أعرف عيون هي الجمال والحسن
واعرف عيون تاخد القلوب بالحضن
وعيون مخيفة وقاسية وعيون كتير
وباحس فيهم كلهم بالحزن
عجبي !!

إيش تطلبي يا نفس فوق كل ده
حظك بيضحك وانتي متنكده
ردت قالت لي النفس : قول للبشر
ما يبصوليش بعيون حزينة كده
عجبي !!

إقلع غماك يا طور وارفض تلف
إكسر تروس الساقية واشتم وتف
قال: بس خطوة كمان وخطوة كمان
يا اوصل نهاية السكة يا البير تجف
عجبي !!!

يا حزين يا قمقم تحت بحر الضياع
حزين أنا زيك و إيه مستطاع
الحزن ما بقالهوش جلال يا جدع
الحزن زي البرد... زي الصداع
عجبي !!!!

في يوم صحيت شاعر براحة وصفا
الهم زال والحزن راح واختفي
خدني العجب وسألت روحي سؤال
أنا مت ؟ ولا وصلت للفلسفة
عجبي !!!

الفيلسوف قاعد يفكر سيبوه
لا تعملوه سلطان ولا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه
عجبي !!!

علي بعد مليون ميل من أرضنا
من الفراغ الكوني بصيت أنا
لا شفت فرق بين جبال وبحور
ولا شفت فرق ما بين عذاب أو هنا
عجبي !!

إنسان أيا إنسان ما أجهلك
ما أتفهك في الكون وما أضألك
شمس وقمر وسدوم وملايين نجوم
و فاكرها يا موهوم مخلوقه لك
عجبي !!

نظرت فوق للنجوم وانا ساير
رجليا عترت في الحفر والحجاير
بقيت أقول وانا ع التراب: يا سلام
مش بس عبره أخذت لكن عباير
عجبي !!!

يا نجم .. نورك ليه كده بيرتجف ؟
هو انت قنديل زيت ؟ أو تختلف
أنا نجم عالي .. بس عالي قوي
وكل ما انظر تحت اخاف انحدف
عجبي !!!!

السم لو كان في الدوا منين يضر ؟
و الموت لو عدونا منين يسر؟
حط القلم في الحبر واكتب كمان
العبد للشهوات .. منين هو حر؟
عجبي !!!

وقفت بين شطين علي قنطرة
الكدب فين والصدق فين يا تري
محتار ح اموت الحوت خرج لي وقالي
هو الكلام يتقاس بالمسطرة
عجبي !!!

سرداب في مستشفي الولاده طويل
صرخات عذاب ورا كل باب وعويل
وفي الطريق متزوقين البنات
متزوقين للحب والمواويل
عجبي !!

الدنيا أوضه كبيره للانتظار
فيها ابن أدم زيه زي الحمار
الهم واحد والملل مشترك
و مفيش حمار بيحاول الانتحار
عجبي !!

أيوب رماه البين بكل العلل
سبع سنين مرضان وعنده شلل
الصبر طيب .. صبر أيوب شفاه
بس الأكيده مات بفعل الملل
عجبي !!!

نسمة ربيع لكن بتكوي الوشوش
طيور جميلة بس من غير عشوش
قلوب بتخفق إنما وحدها
هي الحياه كده كلها في الفاشوش
عجبي !!!!

يا طير يا عالي في السما طظ فيك
ما تفتكرشي ربنا مصطفيك
برضك بتاكل دود وللطين تعًًًًودً
تمص فيه يا حلو ويمص فيك
عجبي !!!

كروان جريح مضروب شعاع م القمر
سقط من السموات فؤاده انكسر
جريت عليه قطه علشان تبلعه
أتاريه خيال شعراء و مالهوش أثر
عجبي !!!

ياللي نصحت الناس بشرب النبيت
مع بنت حلوه .. وعود وضحك وحديت
مش كنت تنصحهم منين يكسبوا
تمن ده كله ؟ والا يمكن نسيت
عجبي !!

ما حد في الدنيا واخد جزاته
و لا حد بيفكر في غير لذاذاته
ما تعرفيش يا حبيبتي .. أنا وانتي مين؟
إنتي عروس النيل ... و أنا النيل بذاته
عجبي !!

رقاصه خرسا ورقصه من غير نغم
دنيا يا مين يصالحها قبل الندم
ساعتين تهز بوجهها يعني
يترجرجوا نهديها يعني نعم
عجبي !!!

إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الفرس
الدنيا قالت قام خطفها الشيطان
عجبي !!!!

من بين شقوق الشيش وشقشقت لك
مع شهقة العصافير وزقزقت لك
نهار جديد انا قوم نشوف نعمليه
انا قلت يا ح تقتلني .. يا ح اقتلك
عجبي !!!

جالك أوان ووقفت موقف وجود
يا تجود بده يا قلبي يا بده تجود
ما حد يقدر يبقي علي كل شئ
مع إن عجبي كل شئ موجود
عجبي !!!

جالك اوان ورفت مشي الجنايز
كيف شفتها يا عبد رب اللذايذ
قال : شفت شيل بالحيل فقير أو امير
كما شالوا في الخمامير فواضي القزايز
عجبي !!

أنا كنت شئ و صبحت شئ ثم شئ
شوف ربنا .. قادرعلي كل شئ
هز الشجر شواشيه ووشوشني قال
لابد ما يموت شئ عشان يحيا شئ
عجبي !!

يا مشرط الجّراح أمانة عليك
وانت ف حشايا تبص من حواليك
فيه نقطة سوده في قلبي بدأت تبان
شيلها كمان .. والفضل يرجع إليك
عجبي !!!

كيف شفت قلبي والنبي يا طبيب
همد ومات والا سامع له دبيب
قاللي لقيته مختنق بالدموع
وما لوش دوا غير لمسه من إيد حبيب
عجبي !!!!

تسلم يا غصن الخوخ يا عود الحطب
بييجي الربيع تطلع زهورك عجب
و انا ليه بيمضي ربيع وييجي ربيع
و لسه برضك قلبي حتة خشب
عجبي !!!

قلبي عليل يا ناس وفي الكاس دواه
مديت له إيدي شربت م اللي حواه
جنبي الشمال خف .. اليمين اتوجع
و إيه يداوي الكبد م اللي كواه
عجبي!!

دي مزكرات وكتبتها من سنين
في نوتة زرقا لون بحور الحنين
عترت فيها .. رميتها في المهملات
وقلت صحيح أما كلام مخبولين
عجبي !!

دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات أكتر بترفض تموت
عجبي !!

الدنيا من غير الربيع ميته
ورقة شجر ضعفانه ومفتته
لا يا جدع غلطان تأمل وشوف
زهر الشتا طالع في عز الشتا
عجبي !!!

ياللي انت بيتك قش مفروش بريش
تقوي عليه الريح .. يصبح ما فيش
عجبي عليك حواليك مخالب كبار
وما لكش غير منقار وقادر تعيش
عجبي !!!!

سمعت نقطة ميه جوه المحيط
بتقول لنقطه ما تنزليش في الغويط
أخاف عليكي م الغرق .. قلت أنا
ده اللي يخاف م الوعد يبقي عبيط
عجبي !!!

بحر الحياه مليان بغرقي الحياه
صرخت خش الموج في حلقي ملاه
قارب نجاه .. صرخت قالوا مفيش
غير بس هو الحب قارب نجاه
عجبي !!!

فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد ولسه رايح بعيد
عجبي !!

كان فيه قمر كأنه فرخ الحمام
علي صغره دق شعاع شق الغمام
أنا كنت حاضر قلت له ينصرك
إشحال لما حتبقي بدر التمام
عجبي !!

النهد زي الفهد نط اندلع
قلبي انهبش بين الضلوع وانخلع
ياللي نهيت البنت عن فعلها
قول للطبيعة كمان تبطل دلع
عجبي !!!

صوتك يا بنت الإيه كأنه بدن
يرقص يزيح الهم يمحي الشجن
يا حلوتي بدنك كأنه كلام
كلام فلاسفه سكروا نسيوا الزمن
عجبي !!!!

كرباج سعاده وقلبي منه اتجلد
رمح كأنه حصان ولف البلد
ورجع لي نص الليل وسألني .. ليه
خجلان تقول انك سعيد يا ولد
عجبي !!!

مزيكة هادية الكون فيها انغمر
وصيف وليل وعقد فل وسمر
يا هل تري الناس كلهم مبسوطين
ويا هل تري شايفين جمال القمر؟
عجبي!!

إنشد يا قلبي غنوتك للجمال
وارقص في صدري من اليمين للشمال
ما هوش بعيد تفضل لبكره سعيد
ده كل يوم فيه الف الف احتمال
عجبي !!

آه لو انا ومحبوبى جزنا الفضا
في سفينة وحدينا واشيا رضا
ساعة صفا تعجبنا نرجع لها
والهم قبل ما ييجي يبقي مضى
عجبي !!

حدوته عن جعران وعن خنفسه
اتقابلوا حبوا بعض ساعة مسا
ولا قال لهم حد اختشوا عيب حرام
ولا حد قال دي علاقة متدنسة
عجبي !!!!

ياللي عرفت الحب يوم وانطوي
حسك تقال مشتاق لنبع الهوي
حسك تقول مشتاق لنبع الغرام
ده الحب مين داق منه قطره...ارتوي
عجبي !!!

زحام وأبواق سيارات مزعجة
اللي يطول له رصيف.. يبقي نجا
لو كنت جنبي يا حبيبي أنا
مش كنت أشوف إن الحياة مبهجة
عجبي!!

إيديا في جيوبي وقلبي طرب
سارح في غربة بس مش مغترب
وحدي لكن ونسان وماشي كده
بابتعد ما اعرف أو باقترب
عجبي !!

يا ميت ندامه ع القلوب الخلا
لا محبة فيها ولا كراهه ولا
حتي يا قلبي الحزن ما عادش فيك
معلهش .. لك يوم برضه راح تتملا
عجبي !!

مرحب ربيع مرحب ربيع مرحبه
يا طفل يا للي ف دمي ناغا وحبا
علشان عيونك يا صغنن هويت
حتي ديدان الأرض و الأغربة
عجبي !!!

فتحت شباكي لشمس الصباح
ما دخلش منه غير عويل الرياح
و فتحت قلبي عشان ابوح بالألم
ما خرجش منه غير محبه وسماح
عجبي !!!!

غمست سنك في السواد يا قلم
عشان ما تكتب شعر يقطر ألم
مالك جرالك إيه يا مجنون ... وليه
رسمت ورده وبيت وقلب وعلم
عجبي !!!

انا الذي عمري اشتياق في اشتياق
و قطر داخل في محطة الفراق
قصدت نبع السم وشربت سم
من كتر شوقي وعشمي في الترياق
عجبي !!!

انا الذي عشت الزمن مضيعه
بروح حزينة معفنة مضعضعه
زرعت شجرة سنط لجل انجرح
لقتها شعر البنت و مفرعه
عجبي !!

لو فيه سلام في الأرض وطمان وأمن
لو كان مفيش ولا فقر ولا خوف جبن
لو يملك الانسان مصير كل شئ
انا كنت اجيب للدنيا ميت ألف ابن
عجبي !!

العشب طاطا للنسايم و نخ
أخضر طري مالهش في الحسن أخ
عصفور عبيط اناغاوي بهجه وغنا
ح انزل هنا.. و انشا لله يهبرني فخ
عجبي !!!

أوصيك يابني بالقمر والزهور
أوصيك بليل القاهرة المسحور
و إن جيت في بالك إشتري عقد فل
لأي سمرا وقبري إوعك تزور
عجبي !!!!

غمض عينيك وارقص بخفة ودلع
الدنيا هي الشابة و انت الجدع
تشوف رشاقة خطوتك تعبدك
لكن انت لو بصيت لرجليك تقع
عجبي !!!

حاسب من الاحزان وحاسب لها
حاسب علي رقابيك من حبلها
راح تنتهي ولابد راح تنتهي
مش انتهت أحزان كتير قبلها؟
عجبي !!!

يأسك و صبرك بين إيديك وانت حر
تيأس ما تيأس الحياه راح تمر
أنا دقت مندا ومندا عجبي لقيت
الصبر مر وبرضك اليأس مر
عجبي !!