كـ العاده موضوع مقفول قبل ما يتفتح !!

بدأ احد الاعضاء بطرح موضوع للنقاش
.. " هل الماء يطفىء النار .. أم لا " .. ثم قال فى أدب جم ..أرجو سماع أرائكم .. وأرجو نقاشا مثمرا ..

-----------------

فدخل عضو آخر على أثره فقال:

" تسلم إيدك جزاك الله خيرا .. شكرا .. موضوع جميل "
وحط صورته وهو راكب على الحمارة من غير بردعة ورقم موبايله جنب الرد ومشى

-------------------------

ودخلت العضوة تيتي .. وقالت

"الله على حصرياتك .. وااااااااااو .. فانتاستك ... الموضوع ده كان شاغلنى جدا .. جدا ... جداااااااا .. وامبارح وانا نايمة ع المخدة فضلت اعيط مووووت .. وحسيت قلبى هيقف من العياط .. وكنت لسة هدخل اكتب الموضوع ده فى المنتدى بس انت سباق دايما" ..
وحطت نغمة الموبايل بتاعتها جنب التوقيع " مديحة حاتم .. اقاهرة .. كشك عم سيد مش عبده .. لازم أغير علشان البلدية "..

-----------------------

ثم قال عضو ثالث ..

"تصدق إنت عضو تافه وبتضيع وقتنا .. افتح كتاب الأنشطة .. 2 ابتدائى .. صفحة 3 هتلاقى الإجابة ..
وبعدها احرق الكتاب وقول هينطفى ولا لا لما رميته فى عين الحمام" ..

--------------------

فقالت العضوة تيتى ..

" إيه ده .. عيب .. عيب .. ازاى تغلط فى العضو الجميل .. دى كدة قلة ادب" ..
شعللها شعللها ..

--------------------

فدخل عضو رابع واقتبس
اقتباس:
المشاركة الأصلية كتبت بواسطة ;1039064865

افتح كتاب الأنشطة .. 2 ابتدائى .. صفحة 3 هتلاقى الإجابة
ثم قال :
" اطلع منهم .. كفاية بقى الحركات بتاعتكم دى .. كفاية تنشر فى المنتدى فكر الجماعة .. أيوة اظهر على حقيقتك .. إنت تبع جماعة التنوير والتبسيط "

-------------------

فرد عليه وقال :

"ومالها جماعة التنوير والتبسيط .. مش أحسن ما أبقى فى جماعة زكى جمعة .. ومحدش عارف مين زكى جمعة ده أصلا ولا ايه التنوير والتبسيط دى"

-------------------
فدخل عضو خامس واقتبس هذه

اقتباس:
المشاركة الأصلية كتبت بواسطة ;1039064865

"ومالها جماعة التنوير والتبسيط .. مش أحسن ما أبقى فى جماعة زكى جمعة
وكتب :
" ست يا ام زكى زكى بيعيط "....

-------------------

فدخل العضو حكيم وقال :

" يا جماعة نهدى من فضلكم دى مش طريقة نقاش ده حتى فيه كاتب إنجليزى قال .. قرد يسلينى ولا غزال شارد .. والنملة مش بتمشى على ركبها "

------------------

فدخل مشرف المنتدى وقال :

" هااااااع.. مين هناك .. حد عايزنى احذف له رد ؟ .. حد عايز اديله انذار .. طيب أنا موجود أهو هنا .. وانتو عارفين ، أى انذرات أى حذف رقبتى ، إنما توثيق معلومات وتحقيق وكدة .. أنا مش شغال بديعة مصابنى .. أنا مش فاضى .. أنا قلت لكم أهو "

------------------

فدخل عضو سادس وقال

" على فكرة بقى الكاتب الإنجليزى ده مش كويس .. لأنه قال كلام بيناقض نفسه .. وانا شايف انك بلاش تنشر أفكاره لأن النملة ممكن تمشى على ركبها عادى وهى بتزحف .."

------------------

فيدخل صاحب الموضوع
ويرد قائلا :

" شكرا لكم جميعا على المشاركات الموووووووووز ... بس أنا ليا رأى انا هنقله هنا ..

اقتباس:
المشاركة الأصلية كتبت بواسطة ;1039064865

وقال الحاخام عبده مشتاق فى كتابه شرح المصرى اليوم فى احوال الغد واليوم .. أنه تقوقز القوقاز متقوقزا
أهو الكلام واضح وصريح .. لا يحتمل تأويل ولا تعديل ..
يتضح هنا من الدليل النقلى إن الحاخام عبده مشتاق ده رجل مكن وحبيبى وكفاءة وأنا بثق فيه .. ومن الدليل العقلى .. قال
تقوقز القوقاز متقوقزا .. تعالوا نفهم مع بعض ..

تقوقز .. فعل ماضى مبنى فى الكردون الجديد ..
القوقاز .. فاعل مرفوع على قاقوزه ..

ومن هنا يتضح أن مستحيل يكون القوقاز يتقوقز وهو واقف .. لازم يتقوقز على نفسه وهو قاعد .. لكن المعاندين والمكابرين يتجهون من هنا وهناك لاثبات عكس ذلك .. وحسبى الله ونعم الوكيل ..

------------------

فيرد أخر

بأن كلامك غلط يا أخ زفر ..لأن الخبير القشاط بن كلب قال إنه متقوقزش أصلا

------------------

فيدخل غيرهم فيقول ..

" أنا أصلا شايف إن الموضوع مينفعش نتكلم فيه لأننا مش أخصائيين قوقزة بعد الضهر .."
ثم يقول:
وبعدين يا شيخ على طلاق ابويا من امى أنا متاكد إن انت نفسك مش فاهم كلامك اللى انت كتبته

-----------------

فيدخل صاحب الموضوع وأصابعه ترتعش على الكى بورد من شدة الغضب .. فيكسر زراري ال shift & ctrl.. فيقول له فى شماتة

طيب أيه رأيك بقى ان اليمين كدة واقع وأمك فعلا طالق من ابيك ..

لانى فاهم معنى كل كلمة انا كتبتها .. واتفضل بقى لم هدومها من الدولاب لانها مش هتبات معاكو النهاردة لانها طاااااااااالق خلاص .. وخد أدى فتوى أهى من موقع الإسلام للشات والمنتديات

اقتباس:
المشاركة الأصلية كتبت بواسطة ;1039064865

إذا أنجب الوالدان وليدا قليل الادب .. ووصلا له شبكة الانترنت فى البيت فانهما مقصرين فى معنى الزواج والاولى بهما الطلاق
وأنا حالا هعمل موضوع .. وفيه استفتاء من اللى موافق إن امك طالق من أبيك .. وهتلاقى المنتدى كله معايا ..

************

أقولكم .. أما ألحق أمشى قبل الموضوع ما يتقفل على صابعى ..

طبعا ولا اى حد فاهم حاجه
انا نفسى مش فاهم حاجه

الخلاااصه

هو احنا ليه بقى اسلوبنا كدا بالحوار
؟؟؟؟؟؟؟
وطبعا ما الكل
بس الاغلبيه
؟؟؟

شكرا

كل فقره فى الموضوع تحتاج إلى وقفه ونقاش بالفعل

بالرغم من ان الموضوع تم طرحه بشكل ساخر وكوميدي إلا أنه وبحق واقع ملموس ، حيث نجدالحوار فى الكثير من الأحيان إما مبتوراً وغير كاملاً وإما يخرج عن سياقه وعن الآداب العامه مفتقراً للتدقيق العلمي والبحث الدقيق والنزاهه

لكن بحق الموضوع رائع وجميل ومطروح بشكل طريف
تحيتي لكـ .

» موضوع مكرر وسيتم الحذف
» موضوع: قصة حياة ابو تريكة من الألف للياء
» نصيحة لمن يريد ان يكتب قصة او رواية او موضوع ويجعل الناس تقرأه